नेपाल प्रिमियर लिग (एनपीएल) मा चितवन राइनोजले कर्णाली याक्सलाई १३१ रनको लक्ष्य प्रस्तुत गरेको छ। चितवनले निर्धारित २० ओभरमा ७ विकेट गुमाएर १३० रन बनाएको हो।
रवि बोपाराले अविजित ५९ रनको उत्कृष्ट पारी खेलेका थिए। उनले ४० बलमा ७ चौका र १ छक्का प्रहार गरे। कप्तान कुशल मल्लले २३ रन बनाए भने विपिन रावलले ११ रनको योगदान दिए। तर, अन्य खेलाडीले दोहोरो अंकमा रन जोड्न सकेनन्।
बलिङतर्फ कर्णालीका विपिन शर्माले ३ विकेट लिए। जिसन मक्सुदले २ विकेट हात पारे भने सोमपाल कामी र नन्दन यादवले समान १-१ विकेट लिए।
